Að búa til glæpamenn

Aðgerðum lögreglunnar við Tækniskólann í dag var af fjölmiðlum lýst sem forvörnum til að sporna við "fíkniefnadjöflinum". Um hina gildishlöðnu orðræðu er óþarfi að fjalla nánar - og öll erum við sammála um að fíkniefnaneysla sé vandamál. En hvernig vandamál er hún eiginlega og hvernig er best að takast á við það?

Í dag þykir fólki eðlilegt að lögregla loki án fyrirvara skóla þar sem er fjöldinn allur af sjálfráða einstaklingum og neiti að hleypa þeim út nema að láta fíkniefnahunda þefa af því. Þessi frelsissvipting er réttlætt með því að hún hafi forvarnargildi og sé partur af þeirri óraunsæu útópíu að samfélagið geti, og eigi, að vera algerlega laust við fíkniefni. En þetta viðhorf er ekkert nema sturlun. Hún elur á ótta, áróðri og sumpartinn röngum upplýsingum sem stjórnvöld, SÁÁ og lögregla gefa okkur. Í kjölfarið eru venjulegir nemendur gerðir að grunuðum glæpamönnum. Hér er verið að búa til hugsanlega glæpamenn vegna neyslu þeirra á efnum sem ættu að flokkast undir heilbrigðisvandamál.

Hið heilaga stríð sem stjórnvöld heyja við þegna sína er fyrir löngu tapað. Á þeim áratugum sem það hefur staðið yfir hefur framboð á fíkniefnum margfaldast, aðgengi þeirra aukist til muna og verðið nær staðið í stað (þrátt fyrir verðbólgu, kreppur, hrun og fleira). Lögregla og stjórnvöld hafa lítið sem ekkert getað spornað við þessari þróun. Það sést kannski best á því að ekki fundust vímuefni á neinum nemanda þrátt fyrir að um hundrað lögreglumenn hafi girt af menntastofnun og leitað á orwellískan hátt á öllum sem þar voru.

Hvað hefði gerst ef gras eða kókaín hefði fundist á nokkrum nemendum? Þeir væru lítillækkaðir fyrir framan alla, farið með þá eins og glæpamenn og fengið meðferð sem er út í hött fyrir venjulega manneskju sem hefur e.t.v. stjórn á neysluvenjum sínum. Þeir eru "de-humanized", gerðir að einhverju óæðra í augum samfélagsins, annars stigs þegna sem má fara með að vild eingöngu vegna þess að þeir neyta ákveðinna efna. Á þann hátt hefur baráttan gegn fíkniefnunum hefur alltaf verið barátta stjórnvalda gegn fólkinu sem neytir þeirra, hvort sem það hefur tekið upplýsta ákvörðun um það eða ekki.

Það sem þau skilja ekki er að fíkniefnaneysla er eingöngu heilbrigðisvandamál - alger óþarfi er að blanda lögreglu inn í það! Sú staðreynd að fíkniefni eru ólögleg hefur hræðilegar afleiðingar í för með sér, svartan innheimtumarkað, fíkla sem þora ekki að leita sér hjálpar sakir þess að vera stimplaðir glæpamenn, félagslega útskúfun og svo framvegis. Sú staðreynd að fíkniefnaverslun er svo oft tengd mansali er eingöngu sú að hvort tveggja er ólöglegt.

Verði fíkniefnaneysla gerð lögleg er það þó alls ekki samasemmerki þess að hún ætti að vera æskileg. Viðhorf samfélagsins til þeirra ætti að vera hið sama og til tóbaks og áfengis, m.t.t. þess hversu sterk efnin að sjálfsögðu eru. Aðeins þá verður hægt að takast á vandanum og minnka eftirspurn til þeirra með ströngu eftirliti sem yrði tengt meðferðarúrræðum - þá minnkar framboðið sömuleiðis. Sú aðferð að búa til glæpamenn úr venjulegu fólki gagnast ekki neinum nema þeim sem vilja hafa stjórn á því.

Fíkniefnaleit í Tækniskólanum

Einmitt, kennum anarkistunum um

Það er alltaf svo þægilegt að skella skuldinni á "anarkistana", þó þessi maður hafi bersýnilega enga hugmynd um hver framdi verknaðinn. Hvað með einhvern samkeppnisaðila, menn á eiturlyfjum, einstaklinga með skemmdarfíkn eða tryggingasvik(þó ég sé ekki að ásaka verktakann um slíkt)?

 

 

Nei, þetta hljóta að vera þessir bölvuðu anarkistar.

,,Menn með öflugar tangir"

Hér hófst þetta allt

      

Landsbankinn kynnir nýja sparnaðarleið í Bretlandi

Nýtingarréttur ofar eignarrétti - í þessu tilviki

Þvílíkt orwellískt samfélag sem við búum í þegar 40-50 lögreglumenn ráðast inn í hús og handtaka fólk sem telur sig hafa nýtingarrétt sem er æðri eignarrétti hjá einstaklingi sem lætur eignir sínar vísvitandi drabbast niður. Fyrst eignaréttur er lögreglunni svona kær eru ýmis önnur mál á dagskrá sem þyrfti að rannsaka fyrst, nú þegar stór hluti þjóðarinnar hefur misst eignir og fjármagn.

Í nágrannalöndum okkar og Hollandi er ágætis reynsla af svona hústökum og hefur það bjargað mörgum fallegum húsum sem annars hefðu orðið kúlunni að bráð. Loksins þegar líf kemur í húsið mætir lögreglan og handtekur fólkið. Djöfulsins andskotans rugl.

Lögregla rýmir Vatnsstíg 4

Ein af merkilegri fréttum ársins

Það er alltaf jafn spennandi að sjá afrek íslenskra vísindamanna hvort heldur hér- eða erlendis. Þessar rannsóknir gætu aukið möguleika okkar á að koma í veg fyrir hvers kyns heilasjúkdóma og heilahrörnun. Því miður er sorglegt að sjá hversu lágum upphæðum er varið í rannsóknir hér á landi því þessir peningar munu fyrr eða síðar skila sér. Ragnhildur á mikið hrós skilið.

Valin uppgötvun ársins í tímaritinu Nature

Hvað er Guð þá að gera í heiðinni hátíð?

Þap er alltaf kostulegt þegar fólk gerir ekki grein milli raunveruleika og skáldskapar. Jólaguðspjallið er augljóslega þjóðsaga sem hefur orðið til á nákvæmlega sama hátt og svipaðar sögur af meyfæðingum í öðrum trúarbrögðum, nú eða sögusögnum af tröllum, álfum, og ekki síst - jólasveinum. Ekki halda að það sé tilviljun að fæðing Jesús eigi að vera 25. desember á sama tíma og sólstöðu - og trúarhátíðir í ótal öðrum menningarheimum.

Heiðarlegur prestur „eyðilagði jólin fyrir börnunum“

Hvar var Guð þegar kreppan reið yfir?

Er hann þá bara að prófa okkur? Eru trúaðar fjölskyldur búnar að sætta sig við að guð var bara annað hvort að sýna reiði sína eða prófa trúna, og nú sé málið að biðja til hans svo hann lagi ástandið? Það held ég nú að sumir yrðu reiðir ef guð kæmi fram og segðist ætla að redda málunum.

 

Lausnin við kreppunni er ekki að krjúpa á kné og fara með bænaþulu, heldur horfa á stöðuna með raunsæi og nota áþreifanlegri aðferðir.

Báðu fyrir landi og þjóð

Rökvilla Bubba Morthens

Það er alltaf ósanngjarnt að saka einhvern um eitthvað sem hann gerir ekki. Hvers vegna eru PETA samtökin ekki að berjast gegn mansali? Flestir væru sammála um að mansal væri mun víðtækara vandamál en misnotkun á dýrum; samt dettur engum í hug að ásaka PETA um vanrækslu í mannréttindamálum. Hvers vegna hefur Nelson Mandela ekki beitt sér harðar gegn ofveiði á hvölum? Svona mætti lengi telja. Fólk með sína sannfæringu í ákveðnum málum berst fyrir þeim - það er ósanngjarnt að væna það um vanrækslu við önnur vandamál því þau eru svo ótal mörg að enginn gæti beitt sér fyrir þeim öllum.

Björk ætti frekar að syngja gegn fátækt

önnur prufa

Ætli þetta virki...

Hitt bloggið

Þessi síða hér er einungis til að geta innskráð mig á hinar og þessar umræður á moggablogginu. Raunveruleg bloggsíða mín er ugluspegill.blogspot.com